Македонија го доби она што го заслужува (или поточно: она што го сакаше Ороспијата од Вавилон и Стејт департментот)! Habeamus papam! Господ нека ни е на помош!
Таборот на благонадежната ни партија на власт (односно нејзиниот врв) добро знае колку гласови добиле легално, а колку во стилот што СДСМ го практикуваше пред да ја загуби власта, па затоа и нема голема причина за радост. Затоа и јас (како лидер на моќната Лига за демократија) се воздржувам од честитки! Разочарувањето на гласачите е големо (и евидентно!). Особено кај многумина од оние што ДПМНЕ ги привлече со својата нагласена национална реторика. Сега, кога претседателот им е избран само и единствено со заслуга на војниците на PDSh нивното разочарување е уште поголемо. Тие добро ја знаат онаа “мудрост” на скопските улици: ако некому му седнеш в скут, ќе мора малу и да се движиш лево-десно, напред-назад со задниот дел од телото (да не речам: “да мешаш”, како што вели оригиналот на изреката). Тоа допрва ја чека благонадежната ни партија на власт! Тоа понижувачко “мешање” додатно ќе го зголемува нерасположението на македонските гласачи и ќе го редуцира нејзиното гласачко тело на идните избори.
Туку, тоа не е ниту мој проблем, ниту проблем на Лигата за демократија. Старите властодршци никогаш не послушаа барем нешто од она што им го кажувавме или што го пишувавме (за нивно и наше добро). Па, еве до кај дотераа! На новите властодршци не ни паѓа на памет да им даваме совети! Тие на последните избори покажаа дека не се луѓе од збор, а ние од Лигата за демократија не забораваме лесно. Пример, нашето излегување од Демократската партија во моментот кога таа се реши за брак со квази-либералите на Стојан Андов. Некој можеби ќе рече дека сме претенциозни, но - такви сме! Мошне избирливи, кога е во прашање друштвото!
Веселбата во таборот на PDSh секако е голема. Па сепак, не чувствувам потреба да им честитам: се покажа дека Македонецот бргу се учи на арно (на демократија), но не и нашите “(со)животни” сопатници (чиешто име не смеам да го напишам без да ги навредам). Тие кутри луѓе, уште пред да се доберат до слободата, дефинитивно ја загубија. И тоа не од нас, туку од своите! Имено, кога се знае дека предноста на г. Петковски беше шеесетина илјади гласови, дека ќе беше невиден успех таа предност во “третиот” круг да се зголеми на осумдесет илјади, и за полуписмен човек е јасно дека на PDSh немаше да му биде тешко и на нај”шведски” избори да обезбеди деведесетина илјади гласови, нужни за победата на нивниот сојузник. Зошто тогаш онаква манифестација на груба сила, каква што не видовме ни во вториот круг? Од две причини: прво, за да покаже PDSh кој е газда во Западна Македонија и второ (не помалу важно) со бројот на добиените гласови да “докаже” дека во вториот (поништен) круг немало фалсификат. Значи, за да си го измие образот!
PDSh, меѓутоа, страшно се мами ако мисли дека е газда во Западна Македонија. Како што, на времето, и Сали Бериша, гадно се измами кога поверува дека тој е газда во Република Албанија. Во моментот кога им го порача тоа на Американците, со предупредување да не се мешаат во внатрешните работи на неговата земја, одненадеж (речиси без причина?!) против него нарасна исто толкаво незадоволство, колку што пред тоа беше големо задоволството од него, и тој мораше да си замине од власта со подвиткана опашка. Тоа го чека и Џафери ако се обиде да стори нешто на своја рака, спротивно на виталните интереси на Америка.
А, знаете ли, што е витален интерес на САД на Балканот? Никогаш нема да ви текне, ако не сте го чуле предупредувањето на Стејт Департментот до Слободан Милошевиќ: да не си игра со главата и да ја задева Македонија, зашто “секој напад врз Македонија ќе се смета за напад врз виталните интереси на САД”! Така рекоа на почетокот од косовската криза и Милошевиќ тоа очигледно никогаш не го заборави! Македонија е од витален интерес за САД! Да ме убие човек не знам зошто е тоа така! Впрочем, зошто САД денес í “советуваат” на Црна Гора да не излегува од југословенската федерација, а утредента по фамозниот македонски референдум (уште беше Џорџ Буш претседател) поитаа да му стават на знаење на Милошевиќ дека северната граница на Македонија ја сметаат за неповредлива или недопирлива (не се сеќавам како точно беше кажано). За секој што умее политички да размислува е јасно како бел ден дека ним (од некои научно-фантастични причини?) им требаме. Ете, затоа велам дека вистинскиот газда на Западна Македонија, а уште помалу на цела Македонија, сепак не е г. Џафери (Господ нека му е нека му е на помош и нему во сето она низ што наскоро ќе мора да мине!).
Газда е Новиот светски поредок! Ороспијата од Вавилон и Стејт Департментот! Не мислеше некој, белки, дека може да биде поинаку?
Но, по обичај: во секое зло и добро! Иако лично гласав за г. Тито Петковски, сепак, кога добро ќе размислам, и добро е што Америте му удриле мерак на безгрешниот отец Борис! Откако сî мина како што мина, фати да ме фаќа страв од помислата уште еднаш шеф на државата да ми биде - Тито! Тие Титовци се многу долговечни! Кога ќе ти стане еднаш претседател, сметај дека кон крајот на вториот мандат ќе донесат уставен закон со кој ќе го прогласат за доживотен претседател. А и стар сум веќе не само да трчам, туку и само да пречекувам и испраќам - штафети!
Башка, што ми се допаѓаат новите (американски!) манири: химна со рака на срце, говор со благослов на крајот (“Господ нека ја благослови Македонија!”) и - национален доход од дваесетина илјади долари per capita!
Ѓорѓи Марјановиќ
РЅ (за Стејт департментот!): ако видите, случајно, дека спрегата Георгиевски-Џафери (Циле, претпоставувам, отпаѓа) не ви ги носи очекуваните плодови, обрнете внимание на Лигата за демократија! Ние сме исто толку Македонци (што ќе рече: кроток народ!), релативно подобро образовани од другите и знаеме да ги вршиме работите! Ќе треба само да научиме да не јадеме многу трици! Јас пак, како претседател на Лигата за демократија, свечено ви ветувам дека нема веќе да го користам евокативниот акроним FOBRICUSA (Former British Colony United States of America: Поранешна Британска Колонија САД), доколку вие ми ветите дека ќе запре срамотната практика нас да нî означуваат како FYROM.
No comments:
Post a Comment